Ish-kryeministri i Kosovës, Ramush Haradinaj, ka uruar qytetarët e Kosovës për Ditën e Çlirimit.
Haradinaj, ka thënë se Kosova ka ndërtuar gjithçka nga fillimi, e sot është shtet që njihet ndërkombëtarisht, një vend për të cilin ai tha se ka njohuri e gjithë bota.
“Të përulur përjetësisht, kujtojmë e nderojmë rrugën e gjatë dhe përpjekjet e mundimshme të shqiptarëve në të gjitha periudhat historike që kulmuan me luftën e Ushtrisë Çlirimtare të Kosovës. Për këto 24 vjet në liri, Kosova është ndërtuar e është zhvilluar jashtëzakonisht shumë, ndoshta më shumë se secili vend në rajon për të njëjtën periudhë kohore”, ka shkruar Haradinaj në Facebook.
Kryetari i AAK-së, ka kujtuar betejat e burrave e grave të UÇK-së, si dhe ka falënderuar aleatët e udhëhequr nga ShBA-të.
“Lirinë tonë e bëri edhe më kuptimplotë, përkrahja e bashkësisë ndërkombëtare në krye me SHBA-të dhe NATO-n, që përshpejtoi fitoren duke ndërprerë vuajtjet dhe gjenocidin që ushtrohej mbi popullin tonë. Ta gëzojmë këtë liri, ta njohim vlerën e saj dhe të vazhdojmë në ndërtimin e të ardhmes sa më të mirë!”, ka shkruar tutje ai./teve1.info/
