Kryetari i Aleancës për Ardhmërinë e Kosovës, Ramush Haradinaj, është takuar me ambasadorin e Italisë në Kosovë, Maurizio Antonini. Gjatë takimit, Haradinaj theksoi se Italia ka treguar një mbështetje të veçantë dhe kujdes të vazhdueshëm për Kosovën gjatë viteve.
Në postimin e tij në Facebook, Haradinaj vuri në pah rolin e rëndësishëm që Italia ka luajtur në paqen dhe stabilitetin e vendit, përmes kontributit të saj në kuadër të KFOR-it, si dhe përmes shumë projekteve ekonomike.
“Shteti mik Italian ndër vite ka treguar kujdes e mbështetje të veçantë për Republikën e Kosovës, duke qenë një ndër kontribuuesit kryesorë për paqen dhe stabilitetin në vend. Mes vendeve tona është krijuar një partneritet që duhet të thellohet, veçanërisht në proceset e rëndësishme si anëtarësimi në NATO,” tha Haradinaj.
Ai gjithashtu falënderoi Italinë për mbështetjen e vazhdueshme në sfidat aktuale që përballon vendi.
