Kreu i Aleancës për Ardhmërinë e Kosovës, Ramush Haradinaj ka vizituar sot familjen e heroit, Afrim Bunjaku në njëvjetorin e vrasjes së tij në Banjskë.
Haradinaj ka thënë se sot kujtojmë trimërinë, vendosmërinë e sakrificen e Afrim Bunjakut, shkruan teve1.info
“Sot kujtojmë trimërinë, vendosmërinë dhe sakrificën sublime të “Heroit të Kosovës”, Afrim Bunjaku, i cili ra heroikisht në mbrojtje të paqes, sigurisë dhe jetës së qytetarëve të Republikës së Kosovës.” – ka shkruar Haradinaj.
Haradinaj ka bërë homazhe pranë varrit të heroit, dhe familjes së tij i ka shprehur respektin për sakrificën e Afrim Bunjakut.
“Në njëvjetorin e rënies, zhvillova homazhe pranë varrit të tij dhe vizitova familjen e tij në Samadrexhë të Vushtrisë. Me këtë rast, bashkëshortes së tij, Lumnijes, vajzës Arbenitës, djemve Jetlumit e Fatlumit dhe gjithë familjes Bunjaku, u shpreha respektin e përjetshëm për sakrificën e Afrimit, që është një nder i përhershëm për Kosovën dhe të gjithë qytetarët e saj.” – ka shkruar Haradinaj.
“Kosova dhe qytetarët e saj do ta kujtojnë përgjithmonë me respekt dhe përulje heroin Afrim Bunjaku.” – përfundoi ai.
