Me rastin e 26-vjetorit të “Epopesë së Dukagjinit” dhe 25-vjetorit të ndërhyrjes së forcave ajrore të NATO-s kundër caqeve ushtarake të ish-regjimit të kasapit të Ballkanit Sllobodan Millosheviq, komuna e Deçanit sot ka organizuar një manifestim qendror.
Ish-komandanti i Zonës Operative të Dukagjinit të Ushtrisë Çlirimtare të Kosovës (UÇK), njëherësh kryetari i Aleancës për Ardhmërinë e Kosovës (AAK), Ramush Haradinaj ka folur mbi rëndësinë e Epopesë së lavdishme të Dukagjinit. Ai ka thënë se me luftën e tyre çlirimtare shqiptarët mbetën në tokat e tyre shekullore, ndërsa forcat e Millosheviqit u larguan.
“Edhe Gllogjani ndodhi për shkak të Prekazit. Ka dashur Zoti atë ditë që po, janë vrarë disa djem të mirë, por nuk është vrarë lufta atë ditë. Është me rëndësi në fund të ditës, për këtë vend ku jemi, këtë truall, kanë mbetur shqiptarët e kanë ikur forcat e Millosheviqit. Kjo është e vërteta e kësaj dite. Disa herë Millosheviq provoi ta zhdukë UÇK-në e shqiptarët, dhe sa herë u thoshte të huajve se për pak i përzë prej Kosovës, ne nuk e kemi lëshuar këtë vend dhe këtë tokë asnjë ditë të luftës, nga 24 marsi 1998 nuk e kemi lëshuar këtë tokë,” tha Haradinaj.
Një fjalë rasti në manifestimin qendror për Epopenë e Dukagjinit mbajti edhe Rifat Jashari nga familja e komandantit legjendar të UÇK-së, Adem Jashari. Ai tha se duhet realizuar amaneti i lënë ndër breza për bashkimin e trojeve shqiptare.
“Dashtë Zoti të jemi bashkë me Shqipërinë me Kosovën, me Luginën që te rrugëtojmë bashkë dhe të i arrijmë qëllimet tona. Atëherë nëse bashkohemi e kemi përfunduar amanetin që kanë rënë brez pas brezi,” tha Jashari./kp
