Kryetari i Aleancës për Ardhmërinë e Kosovës (AAK), Ramush Haradinaj, ka deklaruar se situata e krijuar pas reshjeve të dendura të shiut, të cilat kanë shkaktuar përmbytje në disa zona të Kosovës, paraqet urgjencë kombëtare.
Përmes një postimi në Facebook, Haradinaj ka theksuar se institucionet relevante, si në nivel qendror ashtu edhe lokal, duhet të shumëfishojnë përpjekjet dhe veprimet për të përballuar gjendjen e rënduar në terren.
Ai ka bërë të ditur se ka kontaktuar me kryetarët e komunave nga radhët e AAK-së, për t’u informuar rreth masave që po ndërmerren nga pushteti lokal.
“Sipas informatave që kam marrë, situata është tejet shqetësuese dhe në disa vendbanime ka filluar edhe evakuimi i banorëve. Është e domosdoshme që institucionet përgjegjëse të reagojnë me urgjencë dhe koordinim të plotë për të përballuar këtë gjendje”, ka shkruar Haradinaj.
Ndryshe, reshjet e vazhdueshme të shiut gjatë ditëve të fundit kanë shkaktuar përmbytje në disa pjesë të vendit, duke rrezikuar banorët dhe pronat e tyre./teve1.info/
