Kreu i AAK-së, Ramush Haradinaj, ka kërkuar heqjen e taksës ndaj produkteve të SHBA-së.
“Hiqni çdo taksë ndaj SHBA-së”, ka shkruar shkurtë Haradinaj në një postim në Facebook.
Ndryshe, një ditë pas vendimit të Trump për vendosjen e tarifave për shumë vendet të botës, përfshirë edhe Kosovën, Osmani ka kërkuar nga Qeveria që të heq tarifat për mallrat amerikane.
Pas kësaj ka reaguar ministri në detyrë i Financave, Hekruan Murati i cili duke thënë se si qeveri kanë shprehur gatishmëri dhe kanë pasur diskutim për marrëveshje për tregti të lirë që nga viti 2023, ka kritikuar Osmanin që siç ka thënë ai 3 minuta pas letrës së dërguar në qeveri, lajmi është bërë publik në rrjetet sociale.
“Sot pas orarit të rregullt të punës, në lajme lexova që Presidentja e vendit i paska bërë kërkesë Qeverisë që të pezullojë tarifat ndaj produkteve me origjinë nga ShBA-të. Kërkesa në email ishte dërguar në adresë të Qeverisë në 17:39, ndërkaq kjo gjë ishte bërë publike në rrjetin social X në 17:42, veç 3 minuta më vonë. Secili shtet serioz, këto çështje i trajton larg mediave, dhe publiku njoftohet kur të merret vendimi. Për më tepër, politikat fiskale bien në fushëveprimin e ekzekutivit, konkretisht ministrisë përgjegjëse për financa”, ka shkruar Murati.
Ai ka thënë se qeveria në takime me zyrtarët amerikanë kanë diskutuar për një marrëveshje për tregti të lirë me Shtetet e Bashkuara të Amerikës.
Presidenti i SHBA-së Donald Trump më 2 prill nënshkroi vendimin për tarifa ndaj pothuajse dyqind vendeve botërore, përfshirë Kosovën e Shqipërinë prej 10%.
