Kryetari i Aleancës për Ardhmërinë e Kosovës, Ramush Haradinaj ka deklaruar se nuk do të bëjë koalicion me Lëvizjen Vetëvendosje të udhëhequr nga kryeministri aktual Albin Kurti.
Ai ka thënë se do të preferonte një koalicion me partitë opozitare dhe për këtë ka thënë se është i gatshëm të bashkëpunojë.
“Opozita ka fituar shumicën e votova në krahasim me partinë në pushtet e cila humbi numër të konsiderueshëm të votave .Kam qenë i drejtpërdrejt si me mashtruesin që udhëheq Kosovën por dhe për temat, obligimet që ka Kosova që për qytetarët nuk janë shumë të dashura. Është në nderin tim që të ndihmojë një qeveri të opozitës, asnjëherë me z. Kurtin”, ka thënë Haradinaj në një konferencë për media të hënën.
Haradinaj tha se në procesin zgjedhor të cilën e vlerësojë si më të mirin në Kosovë është i zhgënjyer me rezultatin që kanë marrë.
Ai tha se për këtë rezultat do të ketë reflektim nga ai dhe partia e tij.
“Edhe pse jemi në rezultatet preliminare të 90 % të votave të numëruara dhe kanë mbet votat e diasporës dhe ato me kusht, rezultati nuk është i kënaqshëm dhe gjithsesi se do të reflektojmë, do të reflektojë unë, Aleanca në këtë rezultat që nuk është i mirë dhe fatkeqësisht nuk është i mjaftueshëm për me ndihmu Kosovën”, tha Haradinaj.
Koalicioni për Kosovën fituese i udhëhequr nga AAK sipas rezultateve preliminare ka marrë 7.51% të votave.
