Kryetari i Aleancës për Ardhmërinë e Kosovës, Ramush Haradinaj, pas takimit konsultativ me presidenten Vjosa Osmani ka thënë se do të bëjnë gjithçka për t’i hapur rrugë konstituimit të Kuvendit.
Haradinaj ka theksuar se i ka rikonfirmuar Osmanit përkushtimin e tij dhe të Aleancës për gjetjen e një zgjidhjeje për daljen nga bllokada institucionale.
“Sot, në takimin konsultativ të thirrur nga Presidentja e Republikës, Vjosa Osmani-Sadriu, rikonfirmova përkushtimin tim dhe të Aleancës për të gjetur një zgjidhje për daljen nga bllokada në Kuvend. Si Aleancë, do të bëjmë gjithçka brenda kapacitetit tonë politik dhe përfaqësues për t’i hapur rrugë konstituimit të Kuvendit dhe krijimit të institucioneve që dalin nga zgjedhjet e fundit parlamentare”, ka shkruar ai në Facebook.
Haradinaj ishte lideri i katërt me radhë që presidentja, Vjosa Osmani ka takuar të mërkurën, në përpjekje për të gjetur rrugën drejt daljes nga ngërçi politik.
Gjatë ditës ajo ka pritur në takim edhe kryetarin e Lëvizjes Vetëvendosje, Albin Kurti, atë të Partisë Demokratike të Kosovës, Memli Krasniqi, si dhe atë të Lidhjes Demokratike të Kosovës, Lumir Abdixhiku.
