Kryetari i Aleancës për Ardhmërinë e Kosovës, Ramush Haradinaj, ka deklaruar që marrëveshja e propozuar nga Bashkimi Evropian, është me interes nacional dhe siguron rrugëtimin e Kosovës drejt integrimeve euro-atlantike.
Njëherit, Haradinaj ka shkruar që me kënaqësi ka pritur në takim emisarin special të Bashkimit Evropian për dialogun Kosovë-Serbi, Miroslav Lajcak, së bashku me ekipin e tij, raporton teve1.info.
“I kënaqur që sot në selinë e Aleancës për Ardhmërinë e Kosovës, bashkë me kolegë pritëm në takim Përfaqësuesin Special të BE-së për dialogun z. Miroslav Lajçak dhe ekipin e tij, të cilët na informuan në hollësi për progresin e arritur deri më tash në përfundimin e marrëveshjes për normalizimin e marrëdhënieve mes Kosovës dhe Serbisë. Për Aleancën për Ardhmërinë e Kosovës kjo marrëveshje është me interes nacional, pasi që e siguron rrugëtimin tonë të qëndrueshëm drejt integrimeve euro-atlantike”, thuhet në postimin e Haradinaj në Facebook.
Ndër të tjerash, Haradinaj ka shprehur vlerësimin e tij për shtetet anëtare të Bashkimit Evropian të cilat janë në mbështetje të kësaj marrëveshje.
“E vlerësova lart angazhimin e jashtëzakonshëm të Shteteve të Bashkuara të Amerikës në funksion të arritjes së marrëveshjes, rol i cili është jetik në zbatimin e saj”, thuhet tutje në postimin e tij./teve1.info/.
