Kryetari i Aleancës për Ardhmërinë e Kosovës, Ramush Haradinaj, ka bërë homazhe në Kompleksin Memorial “Adem Jashari”, në Prekaz, për nder të shënimit të 25-vjetorit të Epopesë së Ushtrisë Çlirimtare të Kosovës.
Gjatë homazhit, Haradinaj ka thënë se në këtë vend pushojnë legjendarët, komandanti Adem Jashari dhe familja Jashari.
Ish-kryeministri, ka thënë se nga Prekazi nisemi më të fortë çdoherë për të gjitha sfidat e punës që na presin.
“Sot, më 5 mars me bashkëluftëtar nga gjitha trevat e Kosovës dhe trojet shqiptare, me kolegë deputetë, kryetar të komunave, të rinj e të reja po nderojmë këtu në Prekaz, në vendin ku ka ndodhur kthesa e vetëdijes tonë kombëtare, e vetëdijes për çlirim, ku i gjithë populli pranoi kushtrimin prej këtu për të luftuar deri në çlirim”, tha Haradinaj në Prekaz.
“Në këtë vend pushojnë legjendarët tanë, komandanti ynë, Adem Jashari dhe familja Jashari, po ashtu prej këtij vendi nisemi më të fortë çdoherë për të gjitha ato sfida e punë që na presin”, u shpreh kryetari i AAK-së.
Ndërkaq, përmes një postimi në Facebook, pas vizitës Haradinaj ka shkruar se historisë së Kosovës së lirë dhe të pavarur, i dha vulë sakrifica sublime e familjes Jashari në krye me legjendarin, Adem Jasharin.
“Ata dhanë gjithçka që ishte e tyre, për gjithçka çfarë kemi ne sot. Familja Jashari do të jetë përjetësisht e nderuar dhe frymëzimi më i madh i dashurisë për kombin. Epopeja e UÇK-së, si ngjarja më kulmore e historisë sonë kombëtare është e skalitur me emrat e heronjve, dëshmorëve e martirëve tanë”, ka shkruar ai./teve1.info/
Sot, gjatë ditës homazhe në Prekaz do të bëjnë edhe figura të tjera politike, si dhe qytetarë nga rajone të ndryshme.
