Koalicioni për “Kosovën Fituese” të martën ka mbajtur tubim elektoral me qytetarët e Prishtinës.
Kandidati për kryeministër, Ramush Haradinaj ka thënë se me implementimin e plotë të Ligjit për Kryeqytetin do t’i japin Prishtinës fuqinë që i takon.
Ai ka premtuar përfundimin e Unazës së Jashtme si dhe bërjen e Prishtinës qendër të sportit dhe kulturës në rajon përmes stadiumit të ri dhe sallës koncertale.
“Me implementimin e plotë të Ligjit për Kryeqytetin, do t’i japim Prishtinës fuqinë që i takon. Unaza e Jashtme do të përfundojë më në fund, duke lehtësuar qarkullimin në kryeqytet. Stadiumi i ri dhe Salla Koncertale do ta bëjnë Prishtinën qendër të sportit dhe kulturës në rajon”, ka deklaruar ai.
Haradinaj po ashtu ka premtuar rritje të ekonomisë deri në 7%, ulje të çmimit të energjisë për 20%., hapje të vendeve të reja të punës, bursa për çdo student, grante pa kthim për të rinjtë si dhe mbështetje financiare deri në punësim për punëkërkuesit.
“Programi ynë qeverisës garanton rritje ekonomike deri në 7%, me paga mesatare mbi 1000€ dhe pensione jo më pak se 500€. Do të ulim çmimin e energjisë për 20% duke rritur prodhimin vendor në 1500 MË. Pakoja prej 1 Miliard € për bizneset prodhuese-eksportuese do të hapë vende të reja pune. Çdo student do të ketë bursë, pavarësisht universitetit.Të rinjtë që nisin biznes do të marrin grante pa kthim, ndërsa punëkërkuesit do të kenë mbështetje financiare deri në punësim”, ka shtuar Haradinaj.
Ndërkaq anëtarësimi i drejtpërdrejtë në NATO dhe aleanca e përhershme me Amerikën ka thënë se janë çelësi i zhvillimit të Kosovës.
“Anëtarësimi i drejtpërdrejtë në NATO dhe aleanca e përhershme me Amerikën janë çelësi i zhvillimit të vendit tonë. Vetëm kështu sigurojmë stabilitet afatgjatë dhe tërheqje të investimeve të huaja. Me Kosovën Fituese 1️⃣3️⃣7️⃣ e bëjmë realitet”, ka thënë Haradinaj./teve1.info/
