Kryetari i Aleancës për Ardhmërinë e Kosovës, Ramush Haradinaj, ka thënë se Kosova asnjëherë më parë s’ka pasur nevojë më shumë për Aleancën si koncept politik.
Teksa ka shkruar se ka pasur një iftar me strukturat në Klinë, Haradinaj ka përmendur edhe anëtarësimin e Kosovës në NATO, që sipas tij, në këtë mënyrë do të ketë mundësi zhvillimi dhe mirëqenia.
“Aleanca për Ardhmërinë e Kosovës po rritet e forcohet çdo ditë. Koalicioni të cilit i prinë Aleanca është kthyer në forcë serioze politike, me përkrahje e besim të gjerë si brenda Kosovës e diasporë por edhe te aleatët tanë strategjikë. Në vazhdën e diskutimeve për veprimet konkrete të mobilizimit të saj dhe të shtrirjes e të forcimit të Bashkimit, i cili tashmë e ka krijuar bërthamën e vet me Nismën, Listën Konservatore dhe Forumin Intelektual E-30, Kryesia e Aleancës ka takuar strukturat e saj në Klinë, në një iftar të përbashkët. Kosova kurrë nuk ka pasur nevojë më shumë për Aleancën si koncept politik, për të ofruar ndryshimin e nevojshëm. Ta anëtarësojmë Kosovën në NATO për t’i dhënë mundësi zhvillimit dhe mirëqenies”, thuhet në postimin e Haradinaj.
Po ashtu, kreu i AAK-së, ka thënë se vizitat nëpër komuna janë rast i mirë për t’i shprehur mirënjohjen për angazhimin dhe punën e autoriteteve komunale./teve1.info/.
