Kreu i Aleancës për Ardhmërinë e Kosovës, Ramush Haradinaj, ka nderuar sot figurat emblematike të luftës çlirimtare, Gjeneral Major Ilir Konushevci dhe Dr. Hazir Malaj.
Haradinaj përmes një postimi në Facebook, theksoi rolin kyç të Konushevcit në themelimin e UÇK-së dhe sigurimin e armatimit që nga viti 1993.
Ai kujtoi edhe goditjen e rëndë që përjetuan pas rënies së tij dhe të Luan Haradinajt, duke vënë në pah rëndësinë jetike që kishin për rrjedhën e luftës.
“Sot nderuam figurat emblematike të lirisë sonë, Gjeneral Major Ilir Konushevci dhe Dr. Hazir Malaj. Figura e Gjeneral Major Ilir Konushevcit është një prej më të rëndësishmëve në themelimin dhe ngritjen e Ushtrisë Çlirimtare të Kosovës. Që nga viti 1993, me formimin e njësive të para të armatosura, ai ishte ndër kryesorët në sigurimin e armatimit. Familja ime e bashkëluftëtarë, e kishim shpresën se jo vetëm që do të aftësohemi për luftë por edhe se do të arrijmë ta mbajmë luftën, me kërkesat që shtoheshin për armatim e luftëtarë. Pas rënies së Luanit më 6 Maj 1997, e cila ishte humbje e madhe për luftën çlirimtare, humbja e Ilir Konushevcit ishte goditje e rëndë për ne. Goditja më e madhe ishte tek furnizimi me armë e teknikë luftarake, që ishte jetike për rrjedhën e luftës. Ilir Konushevci dhe Dr. Hazir Malaj, ranë së bashku për ta lartësuar një komb dhe një atdhe. Po ashtu, në ditën e rënies, me perulje e respekt kujtojme sot dëshmorët nga Shaptej; Shemsi, Bajram, Azem dhe Bekë Muslijaj, si dhe Ukë Beqiraj, Rexhep dhe Arben Hajdaraj. I përjetshëm kujtimi për ta!”, ka shkruar Haradinaj.
