Sipas tij, UÇK-ja, nga njësitet guerile po kalonte në fazën e kryengritjes gjithëpopullore.
“Beteja në Baballoq me 21 prill 1998, nisi një kapitull të ri të Luftës Çlirimtare. Ushtria Çlirimtare e Kosovës, nga njësitet guerile, po kalonte në fazën e kryengritjes gjithëpopullore. Në mbarë rajonin e Dukagjinit nisi një mobilizim i madh dhe u krijuan vijat e para frontale dhe zonat e lira, ku pushtuesi i egër kishte humbur kontrollin ushtarak e administrativ”, ka shkruar ai.
Haradinaj shprehet mirënjohës për ata që jetën ia falën lirisë së atdheut.
“Dy vjet para Betejës së Baballoqit, me 1996, Armend Daci, një student i dalluar nga Irzniqi, që ishte bashkuar në UÇK me Adrian Krasniqin dhe Edmond Hoxhën, do të binte në një atentat të organizuar nga forcat e pushtuesit në Prishtinë. Në vitin 1999, në Viti të Marecit, do të binte heroikisht bashkë me shokët e plagosur, Afrim Vitia e Sokol Sopi, atdhetari i madh, bashkëpunëtor i Adem Demaçit, luftëtari i dalluar Isa Kastrati. Emrin e tij do ta nderonte në beteja deri në çlirim, Brigada 172 e Zonës Operative të Karadakut. Përgjithmonë të përulur dhe mirënjohës për ata që jetën ia falën lirisë së Atdheut. Lavdi!”, ka thënë ai. /teve1.info/
