Kryetari i Aleancës për Ardhmërinë e Kosovës (AAK), Ramush Haradinaj, ka kujtuar të rënët e familjes emblematike Markalleshi në 25-vjetorin e rënies.
Haradinaj, ka kujtuar familjen nga Vraniqi i Gjakovës, ku tha se në luftën e UÇK-së i dha Kosovës katër dëshmorë, Mark, Kolë, Prend dhe Memë Lleshi.
“Çdo herë në ballë të përpjekjeve për liri, Markalleshët nuk u zmbrapsen përpara armiqve. Kontributi i tyre dhënë përpjekjeve të vazhdueshme shqiptare për liri dhe pavarësi, përgjatë gjithë shekullit të kaluar është i jashtëzakonshëm”, ka shkruar Haradinaj në një postim në Facebook.
Ai thotë se çdo herë Markalleshët ishin në ballë të përpjekjeve për liri.
“Më 7 gusht të vitit 1998, armiku hasi në rezistencë të paparë. Luftuan të gjithë, i madh e i vogël, gra, burra e pleq. Heroikisht ranë Mark dhe Kolë Lleshi, rrugën e të cilëve e ndjekën bijtë e kësaj familjeje të madhe, Prendi e Mema. Njëkohësisht gjithë familja Markalleshi ishin në ballë të betejës. Gega, Toma dhe Nika ishin luftëtarë të zotë që nga fillimet e luftës për liri”, ka shkruar tutje Haradinaj.
Haradinaj tutje tha se beteja e Markalleshëve dëshmon shtrirjen e luftës për çlirim, mobilizimin pa dallim moshe e gjinie, vendosmërinë e popullit shqiptar që të jetojnë të lirë në trojet e tyre.
“Lavdi heroizmit dhe sakrificës së luftëtarëve dëshmorë, Mark, Kolë, Prend dhe Memë Lleshi”.
