Kryetari i Aleancës së Ardhmërisë së Kosovës, Ramush Haradinaj, ka thënë se për sigurinë e Kosovës është lajm i mirë vizita e drejtorit të Agjencisë Qendrore të Inteligjencës amerikane (CIA) Ulliam Burns.
Sipas Haradinaj, institucionet e Kosovës duhet të qëndrojnë të palëkundura për aleancën me Amerikën sepse ajo është e përjetshme dhe etike.
“Vizita e drejtorit të Agjencisë Qendrore të Inteligjencës z. Burns në Kosovë, është nder i madh për Kosovën dhe lajm i mirë për sigurinë tonë. Për ne, është jetike integrimi në familjen euroatlantike, dhe aleanca me Amerikën është e përjetshme. Institucionet e Kosovës duhet të qëndrojnë të palëkundura për aleancën me Amerikën. Takimet e drejtorit z. Burns me udhëheqësit e institucioneve, janë lajm i mirë për Kosovën”, ka shkruar Haradinaj në Facebook.
Po ashtu, ai ka folur edhe për kryeministrin Kurti për të cilin ka thënë se askush nuk guxon ta rrezikojë aleancën e Kosovës me Amerikën.
“Sa i përket Kurtit dhe agjendës së tij, i’a lëmë kohës ta dëshmojë, por askush nuk mund ta rrezikojë aleancën e Kosovës me Amerikën”, ka shtuar Haradinaj.
Ndryshe, Shefi i Agjencisë Qendrore amerikane të Inteligjencës (CIA), Uilliam Burns, të enjten ka mbërritur në Kosovë ku është takuar me presidenten e Kosovës, Vjosa Osmani.
Ndërsa, sot është takuar edhe me kryeministrin e Kosovës, Albin Kurti.
Vizita e shefit të CIA-s në Kosovë ka pasuar vizitat që ai ka zhvilluar në Bosnje e Hercegovine dhe në Serbi.
