Kryetari i AAK-së, Ramush Haradinaj, kërkoi nga presidentja, kyrparlamentari dhe kryeministri i Kosovës që të kërkojnë nga presidenti i SHBA-së, Biden, që t’i pres në Shtëpinë e Bardhë për ta nënshkruar marrëveshjen finale me Serbinë e cila sipas tij duhet të jetë me njohje reciproke, gjithëpërfshirëse dhe ligjërisht e obligueshme.
Haradinaj para deputetëve tha se Kosova një nga temat më të rëndësishme aktualisht e ka dialogun me Serbinë.
“Të ankohemi korridoreve të Kuvendit tonë në njërin nga ata që vjen në Prishtinë nuk fitojmë kurgjo. Kjo punë zgjidhet ndryshe, presidentja, kryetari i Kuvendit, kryeministri, një letër të përbashkët presidentit të Amerikës. I nderuar president është afrua përmbyllja ose normalizim i plotë me Serbinë. A po na pret në Shtëpinë e Bardhë ta nënshkruajmë marrëveshjen historike, një marrëveshje gjithëpërfshirëse, me njohje reciproke, normalizim të plotë, obligative ligjore. Çdo rrugë tjetër do ta lodhë Kosovën, do t’i lodhë ata që e përkrahin Kosovën dhe mund të na sjellë pasoja”, tha Haradinaj.
Haradinaj tha se tema si dialogu dhe ndjeshmëria e kësaj teme e obligon kryeministrin me e konsultu parlamentin, andaj sipas Haradinajt, kryeministri i Kosovës nëse nuk e bënë këtë del nga obligimet e veta, nga përgjegjësitë e veta.
Kurse sa i përket nivelit të dialogut, Haradinaj tha se nuk po diskutohet me njerëzit vendimmarrës, por sipas tij me të ngarkuar për dialog.
“Ka diçka që është shumë me rëndësi. Ajo që i thuhet opinionit, duhet të jep sqarime kryeministri për të, dhe më së miri në parlament, jo me e ndjekë gazetarët në traktor por në parlament sepse për këtë është parlamenti. Çka është ky dokument, një dokument franko-gjerman, një dokument tjetër, jo me na dhënë për publik dokumentet sensitive por t’i tregoj kuvendit. Sipas meje nuk ka dokuemtn franko-gjerman, është ajo loja e caktuar që i bëjnë kuzhinat e caktuara është vetëm një dokument amerikano-evropian, por është vetëm një dokument. Duhet mi tregu Kosovës a është një dokument apo janë shumë. Unë e di që është vetëm një. Ajo që më habitë është pse ne po shpresojmë që të arrijmë sukses me këtë nivel të dialogut, e cili është ky nivel, i Lajçakut, i të ngarkuarve, por jo i vendimmarrësve”, tha Haradinaj.