Kryetari i Aleancës për Ardhmërinë e Kosovës, Ramush Haradinaj dhe kandidati i kësaj partie për kryetar të Obiliqit, Ali Krasniqi, në ditën e katërt të fushatës zgjedhore për zgjedhjet lokale të 12 tetorit, kanë zhvilluar një ecje në sheshin kryesor të qytetit.
Haradinaj ka kujtuar kohën kur AAK-ja ka qenë në qeverisjen qendrore, duke theksuar se atëkohë ishte fuqizuar Ligji i posaçëm për Obiliqin, që sipas tij, “nuk ishte thjesht një dokument, por një zotim për një trajtim të merituar për qytetarët e këtij qyteti”.
“Sot u bashkuam në qytetin e dritës dhe energjisë. Si kryeministër, Obiliqin nga një komunë të lënë jashtë kujdesit shtetëror, e shndërruam në një qendër të rëndësishme zhvillimi, me infrastrukturë moderne dhe shërbime cilësore për qytetarët. Ligji i posaçëm që miratuam për Obiliqin nuk ishte thjesht një dokument, por zotimi ynë për një trajtim të merituar për banorët e këtij qyteti. Sheshet e ndërtuara, shkollat, ndriçimi i rrugëve, kthimi i pronave të KEK-ut në pronë komunale, dhe projektet tjera infrastrukturore, mbajnë vulën e qeverisjes sime dhe të Aleancës”, ka shkruar ai në Facebook.
Ai ka shtuar se kandidati i AAK-së për kryetar të Obiliqit përfaqëson vizionin dhe vendosmërinë për ta çuar përpara zhvillimin e ‘qytetit të energjisë’.
“Kandidati ynë për kryetar të Komunës, Ali Krasniqi, ekonomist me profesion dhe pjesëmarrës i Luftës Çlirimtare, së bashku me listën tonë për asamble të përbërë nga një ekip i mrekullueshëm, përfaqësojnë vizionin dhe vendosmërinë për ta çuar përpara zhvillimin e qytetit të energjisë”, ka theksuar Haradinaj.
