Deputeti i VV’së, Dimal Basha, i ka reaguar kryetarit të AAK-së, Ramush Haradinajt, pasi ky i fundit e pyeti Kurtin se a është me prokurorin apo me Besnik Mujecin – asamblisti i LVV-së që u arrestua për kontrabandim të drogës.
Ai tha se fakti që e kanë shkarkuar tregon se më kë janë, duke pohuar “ne jemi gjithë për drejtësi, por prokuroria nuk po është, po zgjedh kënd me ndjek e kënd jo!”.
Postimi i plotë e tij:
Ramush, fakti që e kemi shkarku atë djalin kallëzon se me kë jemi!
Ne jemi gjithë për drejtësi, por prokuroria nuk po është, po zgjedh kënd me ndjek e kënd jo!
Për shembull, t’ish kanë prokuroria me drejtësinë, ti sot ishe t’u dhanë përgjegjësi për rritjen e çmimit të shpronësimit të autostradës Kijevë – Zahaç, prej 31 në 42 milionë euro.
Me ty në krye keni marrë vendim me pagu 11 milionë euro më shumë, me dyfishim të çmimeve të vetëm DISA parcelave, dhe ky vendim u bë publik me 31 dhjetor, natën e vitit të ri, që me kalu nën radar!
Nuk u kanë keq me vet Fatmirin me çka po mirret, se asaj udhe je edhe ti!
Ndryshe, dje Lëvizja Vetëvendosje e ka përjashtuar asamblistin, Besnik Mujeci, i cili u arrestua në Shqipëri nën dyshimin për trafikim droge.
Këtë ka bërë të ditur Sekretari Organizativ i VV-së, Alim Rama, përcjell teve1.info.
“Pas marrjes së informacionit për arrestimin e asambleistit të Komunës së Prishtinës nga radhët e subjektit tonë, Komisionin Diciplinor i LVV menjëherë ka trajtuar këtë rast. Si rrjedhojë Komisioni Diciplinor i Lëvizjes VETËVENDOSJE! në mbledhjen e tij mori vendim për përjashtimin e anëtarit Besnik Mujeci nga anëtarësia dhe të gjitha strukturat e Lëvizjes VETËVENDOSJE!”, ka shkruar Rama në Facebook.
Njëherit, ka shtuar se VV mbetet e përkushtuar që dukuritë e tilla do të jenë absolutisht të patolerueshme dhe të ndëshkuara.
Mediat në Shqipëri njoftuan gjatë ditës së djeshme për një aksion të madh policor në Shqipëri ku u arrestuan pesë persona, mes tyre edhe Besnik Mujeci.
