Me rastin e 5 Majit, Ditës së Dëshmorëve të Kombit Shqiptar, kryetari i AAK-së, Ramush Haradinaj ka qëndruar në Zahaq të Pejës ku është përuruar lapidari i Dëshmorëve dhe Martirëve për 138 dëshmorët e Pejës.
Haradinaj ka thënë se në rrethinën e Istogut luftëtarët e UÇK-së luftonin deri në vetëmohim, duke i dhënë goditjet e fundit armikut.
Sipas tij heroizmi dhe sakrifica e Dëshmorëve të Kombit do të jenë gjithmonë udhërrëfyes në shtetndërtimin dhe forcimin e faktorit shqiptar si garantues i paqes, stabilitetit dhe zhvillimit në rajon.
“Me rastin e 5 Majit, Ditës së Dëshmorëve të Kombit Shqiptar, pata nderin të jem në Zahaq të Pejës, në përurimin e lapidarit të Dëshmorëve dhe Martirëve, ku nderuam 138 dëshmorët e Pejës dhe të gjithë ata që ranë për liri dhe dinjitet kombëtar, në të gjitha trevat dhe etapat e historisë sonë. Sa më shumë afrohej liria, aq më shumë shtohej intensiteti i luftës ndaj okupatorit. Në rrethinën e Istogut, trimat e Ushtrisë Çlirimtare luftonin deri në vetëmohim, duke i dhënë goditjet e fundit armikut. Po në këtë datë, 5 Maj 1999, në altarin e lirisë ra edhe Muharrem Vuthaj nga Vrella, një luftëtar që mishëronte vlerat më të larta të trimërisë dhe dashurisë për atdheun. Liria në këtë tokë është e shenjtë dhe do të jetojë për aq kohë sa ne i qëndrojmë besnikë gjakut të derdhur për të. Heroizmi dhe sakrifica e Dëshmorëve të Kombit do të jenë gjithmonë udhërrëfyes në shtetndërtimin tonë dhe në forcimin e faktorit shqiptar si garantues i paqes, stabilitetit dhe zhvillimit në rajon. Lavdi e përjetshme të rënëve për liri”, ka shkruar ai në Facebook.
