Kryetari i Aleancës për Ardhmërinë e Kosovës, Ramush Haradinaj ka pritur në takim shefin e zyrës së BE-së në Kosovë me Tomáš Szunyog.
Në këtë takim siç ka njoftuar Haradinaj është diskutuar për zhvillimet politike në vend e marrëveshjen e Kosovës me Serbinë.
Haradinaj ka thënë se nga Szunyog ka marrë vlerësim për qëndrimin në dialog.
“Në një takim përmbajtjesor të zhvilluar sot, shef i Zyrës së Bashkimit Evropian, njëherit Përfaqësues Special i BE-së në Kosovë, kemi diskutuar hapur për zhvillimet politike në vend, kjo edhe në frymën e obligimeve që duhet t’i kryejnë palët si rezultat i marrëveshjes për normalizim të marrëdhënieve midis Kosovës dhe Serbisë. Shpreha konsideratën time për angazhimin unik të shteteve anëtare të BE-së për arritjen e kësaj marrëveshjeje. Po ashtu, pata kënaqësinë që të pranoj vlerësimin e Ambasadorit Szunyog për rolin konstruktiv të Aleancës për Ardhmërinë e Kosovës dhe timin gjatë gjithë këtij procesi”, ka shkruar Haradinaj.
Ai ka thënë se implementimi i kësaj marrëveshje hapë një perspektivë më të qartë integruese të Kosovës në Bashkimin Evropian dhe në strukturat euro-atlantike./teve1.info/
