Kryetari i Aleancës për Ardhmërinë e Kosovës(AAK), e ka konsideruar mashtrim rritjen e pensioneve nga Qeveria e Kosovës, pasi siç ka thënë ai, kjo rritje është bërë në shkëmbim të votës.
Sipas Haradinaj, vendimi jo vetëm që nuk ndikon në mirëqenien e pensionistëve, por gjithashtu lë jashtë kategori të tjera sociale.
“Rritja e pensioneve sot nga Qeveria në ikje është mashtrim. Ky mashtrim shpërfaq fytyrën e këtyre njerëzve që shkon përtej humanizmit sepse ka në vete mesazhin e mashtrimit në shkëmbim të votës për njërën ndër kategoritë më të ndjeshme të shoqërisë, pensionistët. Përveç që është mashtuese, kjo rritje është gjysmake dhe duke marrë parasysh bazën e ulët të pensioneve, as nuk ndikon në mirëqenien e pensionistëve por edhe lë jashtë kategori tjera sociale”, ka shkruar ai në Facebook.
Më tej, Haradinaj, ka premtuar se nëse ai vjen në pushtet të gjitha skemat pensionale do të jenë më shumë se paga minimale prej 500 euro.
“Në qeverinë e ardhshme që ne synojmë ta ndërtojmë, qysh në ditët e para të qeverisjes të gjitha pensionet dhe skemat pensionale do të kenë rritje të menjëhershme prej 50% dhe pastaj çdo vit rritje prej 10%. Të gjitha skemat pensionale do të jenë më shumë se paga minimale prej €500”, ka shtuar Haradinaj.
Kryeministri Kurti në një konferencë të përbashkët për media me ministrin Murati, ka njoftuar se nga ky muaj do të rriten për 20 për qind pensionet për disa kategori të pensionistëve.
Sipas këtij vendimi, pensioni bazik i moshës do të rritet në 120 euro, pensioni kontributpagues për kategorinë e parë do rritet në 218 euro, për kategorinë e dytë 237 euro, për të tretë 256 euro dhe për të katërtën 318 euro./teve1,info/
