Kryetari i Aleancës për Ardhmërinë e Kosovës, Ramush Haradinaj, tha se kryeministri i Kosovës, Albin Kurti, iu ka kthyer mashtrimeve elektorale, raporton teev1.info
Përmes një statusi në Facebook, Haradinaj ka shkruar se Kurti po i mashtron qytetarët se ka hartuar pakon më të madhe mbështetëse për qytetarët, e ka subvencionuar rrymën dhe përballjen me inflacionin. Derisa sipas tij nuk po e përmend shumëfishimin e çmimit të energjisë elektrike dhe rritjen e çmimeve në nivelin e papërballueshëm, për siç ka thënë Haradinaj, edhe 2-3 të punësuar në familje.
“Edhe sot mashtron se si qeveria e tij e paska pasur pakon më të madhe mbështetëse për qytetarët në Ballkan, gjë që është mashtrim ordiner. I përmend ndihmat sociale prej 100 eurove si sukses të madh, e nuk i përmend pagat më të ulëta në Ballkan. E përmend subvencionimin e rrymës, e nuk thotë se rritja e çmimit të energjisë është shumëfishuar nën qeverisjen e tij. E përmend përballjen me inflacionin, por nuk thotë se çmimet e artikujve elementar të jetesës janë bërë të papërballueshëm edhe për familjet me nga 2 e 3 të punësuar.
Fjalët e bukura se shoqëria përparon kur askush nuk mbetet mbrapa, janë në shpërputhje me realitetin që po e jetojmë. Në Kosovë sot të gjithë kanë mbetur mbrapa. Kjo është e vërteta e jo mashtrimet që kryeministri i ka në diskursin e tij, por që ato marrin përmasa neveritëse në prag të zgjedhjeve!”, ka shkruar Haradinaj në Facebook.
