Kryetari i Aleancës për Ardhmërinë e Kosovës, Ramush Haradinaj u ka bërë thirrje forcave politike dhe qytetarëve që të tejkalojnë interesat personale dhe partiake për të nxjerrë vendin nga kriza aktuale institucionale.
Në një mesazh drejtuar qytetarëve, Haradinaj thekson se Kosova po përballet me një situatë të rënduar ekonomike, politike dhe të sigurisë, ndërsa vendi ndodhet në një ngërç institucional pas përfundimit të zgjedhjeve dhe me afatin kushtetues të tejkaluar për zgjedhjen e presidentit.
Sipas tij, kjo gjendje jonormale është rezultat i mungesës së vullnetit politik për të gjetur zgjidhje në interes të shtetit dhe qytetarëve.
Ai thekson se vendi ndodhet në një moment vendimtar, ku kërkohet bashkim dhe përgjegjësi për të rikthyer funksionimin normal të institucioneve.
Haradinaj kujtoi gjithashtu sakrificat dhe përpjekjet që janë bërë ndër vite për ndërtimin e shtetit të Kosovës, duke theksuar rëndësinë e aleancës me partnerët ndërkombëtarë, në veçanti me Shtetet e Bashkuara të Amerikës.
Ai theksoi se Kosova duhet të përqendrohet në zhvillim ekonomik, rritje të mirëqenies së qytetarëve, ndërtim të një sistemi modern arsimor dhe shëndetësor, si dhe në forcimin e demokracisë dhe të institucioneve shtetërore.
Në fund, kreu i AAK-së bëri thirrje për unitet politik dhe shoqëror, me qëllim që Kosova të ecë përpara drejt integrimit në NATO dhe Bashkimin Evropian dhe të bëhet pjesë e familjes së demokracive perëndimore.
