Që nga viti i ardhshëm Kosova pritet të bëhet edhe më një kompani, investim ky i cili vjen nga Gjermania. Në një organizim të kompanisë në fjalë, “Zilonis”, u treguan detajet e planifikuara për investimin në Prishtinë. Ndërkaq, nga përfaqësues të Gjermanisë në Kosovë, si dhe të Odave të vendit, u theksua se Kosova është ambient për biznes dhe po ashtu çdo bashkëpunim nga jashtë është i mirëpritur.
Me ardhjen e të gjithë të ftuarve, filloi prezantimi i Kompanisë prodhuese gjermane “Zilonis” e cila vitin e ardhshëm hapet në Kosovë.
I pari që mori fjalën ishte njëri prej drejtorëve ekzekutiv të kësaj kompanie, Musa Smakaj.
Ai sqaroi punën që ata bëjnë, si ashtu edhe procesin e hapjes të pikave të tjera, e që njëra nga këto do të jetë në Prishtinë.
Ai theksoi se ka besim në Kosovën pavarësisht zhvillimeve të fundit në pjesën veriore të vendit.
Pas tij, fjalën mori Zv. Ambasadori i Gjermanisë në Kosovë, Matthias Conrad.
Edhe ky përmendi situatën e tensionuar në veri, për të cilën tha se nuk duhet të jetë shkak që Kosova të pësoi në investimet e jashtme.
“Jam mirënjohës që Gjermania do të ndikojë me këtë investim qoftë në rritje apo në ekonominë e Kosovës. Ka tensione politike, por Kosova ka shumë për të treguar në gjithsecilën fushë, e sidomos në ekonomi. Dua të theksoi se Kosova është një vend i mirë për të bërë biznes dhe me vendimin tuaj për investim në këtë vend suksesi do të jetë i sigurt. Dhe e përsëris ka shumë për të dhënë e shume për të treguar”, ka deklaruar zv.ambasadori i Gjermanisë në Kosovë, Mattias Conrad.
Oda Gjermano – Kosovare dhe Oda Ekonomike e Kosovës mirëpritën këtë lloj bashkëpunimi.
Kompania “Zilonis” ka filluar punën në vitin 2018. Deri tash ajo numëron katër pika në Gjermani, ndërsa qysh prej këtij viti ka filluar angazhimin për hapjen e dy pikave të reja, njërën në Kosovë dhe tjetrën në Kinë.
