Njohësi i sigurisë, Fatmir Qollaku ka përshëndetur vendimin e Qeverisë që do të hapë fabrikë për prodhimin e municionit si dhe laborator për dizajnimin e fluturakeve pa pilot në Kosovë.
Qollaku tha se kjo fabrikë nuk mund të bëhet brenda këtij mandati, pasi sipas tij kjo Qeveri nuk ka kohë me jetosu në praktikë.
Tutje, ai në emisionin “Ditari” tha se kjo fabrikë është e nevojshme dhe në të ardhmen mund të jetë edhe prodhuese për eksport në vende tjera.
“Kjo fabrikë nëse mund të bëhet, por do të bëhet pasi të zgjedhet Qeveria e re tjetër, nuk është më rëndësie se kush do të jetë kryeministër…Kjo Qeveri nuk ka kohë me jetësu në praktikë fabrikën për prodhimin e këtyre produkteve të fushës ushtarake. Nëse miqtë ndërkombëtare e kanë japur dritën e gjelbër pse mos të niset një fabrikë e tillë sepse e thashë edhe një herë se aplikimi i këtyre produkteve apo vërja në përdorim është më se e nevojshme, si dhe pse të importohet. Bile mund të jetë shumë lehtë kjo fabrike e ardhshme e Kosovës edhe prodhues për eksport…”, ka deklaruar ai.
Më tej, ai tha se koha e hedhjes dhe zyrtarizimi i kësaj ideje i ngjan më shumë një fushate të sofistikuar parazgjedhore.
“Koha e hedhjes se kësaj ideje dhe zyrtarizimi i saj me vendim të Qeverisë i ngjanë më shumë një fushate të sofistikuar parazgjedhore sesa një projekt i njëmend që do të realizohet shpejt…”, ka thënë ai.
Ndryshe, shefi i ekzekutivit, Albin Kurti sot në mbledhjen e Qeverisë ka marrë vendim për hapjen e fabrikës për prodhimin e municionit dhe për laboratorin mbi dizajnimin e fluturakeve pa pilot në Kosovë.
Kurti u shpreh se ditën e FSK-së, po e shënojmë më një vendim të rëndësishëm për të garantuar zhvillimin e qëndrueshëm të ushtrisë së Kosovës.
Ai ka thënë se mbrojtja edhe forcimi i Ushtrisë së Kosovës ka qenë prioritet i qeverisë./teve1.info/
