Të hënën është hapur konkursi për pranimin e studentëve të Universitetit të Prishtinës në Qendrën e Studentëve në Prishtinë.
Lajmin e ka bërë të ditur ministrja në detyrë e Arsimit, Arbërie Nagavci, duke theksuar se Qendra do të ofrojë strehim për 4 mijë studentë.
Përveç strehimit, Nagavci ka thënë se do të ofrohen edhe hapësira të përshtatshme për studim dhe ushqim cilësor në mensë, ndërsa për studentët që dëshirojnë të përfitojnë vetëm nga shërbimi ushqimor janë të dedikuara 1 mijë e 500 vende.
Sipas Nagavcit, shërbimet ofrohen me çmime simbolike dhe të përballueshme për studentët.
“20 euro në muaj për akomodim dhe 15 euro në muaj për shërbime ushqimore”, ka shkruar ajo në Facebook.
Studentët e UP-së mund të aplikojnë online për akomodim dhe ushqim në mensë, përmes platformës qs.rks-gov.net nga 15 deri më 20 shtator.
“Ministria e Arsimit mbetet e përkushtuar të garantojë kushte dinjitoze për studime dhe të mbështesë zhvillimin akademik, personal dhe profesional të studentëve”, ka theksuar Nagavci në fund të postimit.
