Aplikimi për mbështetjen e studentëve në vlerë prej 100 eurosh, si dhe për Bursën e Mobilitetit të Studentëve, tashmë është i hapur në platformën “e-Kosova”, tek shërbimi “Familja”.
Lajmin e ka bërë të ditur ministri në detyrë i Financave, Hekuran Murati, përmes një postimi në rrjetin social Facebook.
Sipas Muratit, për shtesën e njëhershme 100 euro të drejtë aplikimi kanë studentët aktivë të të gjitha niveleve (Bachelor, Master, Doktoratë) që studiojnë në ndonjërin nga universitetet e akredituara në Kosovë, publike dhe private.
“Sigurohuni që i plotësoni të gjitha fushat saktë dhe pa gabime. Nëse ka gabime, aplikimi refuzohet. Afati për aplikim është deri në fund të muajit tetor, kurse pagesat do të kryhet me grupe, sipas radhës së aplikimit”, ka shkruar ai.
Ndërkohë për Bursën e Mobilitetit të Studentëve, Murati ka njoftuar se të drejtë aplikimi kanë studentët e nivelit Bachelor, shtetas të Kosovës, që studiojnë në ndonjërin nga universitetet e akredituara në Kosovë.
“Kusht për përfitimin e Bursës së Mobilitetit është që familja e studentit/studentes të ketë të ardhura vjetore bruto jo më shumë se 12,000 euro. Sigurohuni që i plotësoni të gjitha fushat saktë dhe pa gabime. Nëse ka gabime, aplikimi refuzohet”, ka theksuar Murati.
Ndryshe, Qeveria në detyrë dy ditë më parë ndau 26 milionë euro në formë të mbështetjes së njëhershme prej 100 eurove për të gjithë studentët dhe në pakon e mobilitetit për mbështetjen e studentëve bazuar në distancën që e kanë nga vendi i banimit tek ai ku studiojnë.
