Muzeu “Nënë Tereza” në Prizren, u hap dhe funksionalizua zyrtarisht dje, në ditën e pavarësisë së Kosovës.
Ministria e Kulturës, në partneritet me Komunën e Prizrenit dhe organizatën CHwB, me mbështetje nga Agjencia Suedeze SIDA, kanë bashkuar forcat për të funksionalizuar këtë Muze, i cili pasqyron jetën dhe veprimtarinë e Nënës Terezë nga fëmijëria e hershme, ndihmon për të kuptuar synimet dhe misionin e saj të madh: të krijonte institucione qëndrueshmërie në shërbim të më të varfërve.
Përpos ekspozitës së përhershme, muzeu do të ofrojë program artistik vjetor dhe aktivitete edukuese për fëmijë, duke u shndërruar kështu në një hapësirë referente për vizitorët e shumtë që e vizitojnë Prizrenin.
Në këtë ngjarje morën pjesë përfaqësues të institucioneve dhe organizatave të vendit, ndërsa fjalë mbajtën këshilltarja e ministrit Çeku, Nora Arapi Krasniqi, kryetari i Prizrenit, Shaqir Totaj dhe drejtori i organizatës CHwB Kosova, Sali Shoshi.
