Hansi Flick ka ndarë mendimet e tij mbi përgatitjet e Barcelonës për El Clasicon e ardhshme kundër Real Madridit, duke theksuar mentalitetin e ekipit pas humbjes në mesjavë nga Interi në Ligën e Kampionëve dhe përqendrimin e tyre në sfidën që e pret.
Trajneri gjerman ka folur sot (e premte) në konferencën për shtyp para ndeshjes ndaj Real Madridit, e cila zhvillohet te dielën me fillim nga ora 16:15 në ‘Estadi Olimpic Lluis Companys’.
“Po ia dalim mirë. Pas humbjes në Milano, të gjithë e dinë se nuk është e lehtë, por po i bëjmë gjërat mirë. Kemi folur për atë që duam të bëjmë në këto dy javë. Lojtarët kanë energji. Është bërë punë e shkëlqyer në katër muajt e fundit dhe duam të vazhdojmë kështu”, ka thënë fillimisht Flick në konferencën për shtyp.
Ai foli gjithashtu për qasjen e ekipit ndaj serisë së ardhshme të ndeshjeve, që përfshin edhe El Clasicon vendimtare.
“Kemi katër ndeshje dhe një El Clasico për të treguar se sa mirë mund të luajmë. Duhet të tregojmë besim në atë që duam të shfaqim”.
“Kemi folur me lojtarët për të mësuar ndjenjat e tyre, e bëjmë këtë hapur. Në një ndeshje si El Clasico, duhet të jemi 100% të gatshëm, aktivë, me intensitet, dominues”.
“Real Madrid? Ata janë një ekip fantastik, por ne po luajmë në shtëpi. Në çdo moment të ndeshjes, tifozët e dinë se çfarë na duhet. Kur luan këtë lloj ndeshjeje, edhe Madridi do të përpiqet të fitojë. Për ne, nuk shqetësohem për situatën në tabelë, ne duhet të fitojmë. Ky është mentaliteti ynë, si nisemi që nga fillimi”.
“Nuk e di kurrë se si do të jetë ndeshja. Janë dy ekipe të shkëlqyera dhe shpresojmë të shfrytëzojmë avantazhin e ndeshjes në shtëpi. Ndoshta do të jetë pak më ndryshe nga ndeshja në Madrid, shpresoj të largohemi me tre pikët”.
“Kur kemi luajtur kundër tyre, ata na markojnë lojtarë për lojtar, janë shumë të mirë në tranzicion. Ata kanë një sistem sulmi të frikshëm”, përfundoi trajneri i Barcelonës.
