Trajneri i Barcelonës, Hansi Flick, po synon përfundimin e një sezoni thuajse të përkryer.
Flicku me Barcelonën në janar e fitoi trofeun e Superkupës që ishte i pari për të me klubin “blaugrana”. Por tani ai synon edhe më shumë.
Është në garë për të triumfuar në La Liga, Ligën e Kampionëve dhe në Kupën e Mbretit.
Me fitoren ndaj Osasunas 3:0, ish-trajneri i Bayern Munichut ka 19 ndeshje rresht pa humbje që nga fillimi i vitit 2025. I ka 16 fitore dhe tri barazime.
Humbjen e fundit e ka pësuar në vitin 2024, në shtëpi nga Atletico Madridi.
Me 19 ndeshje rresht pa humbje, Flick e ka kaluar Xavi Hernandezin që në krye të Barçës kishte 18 ndeshje rresht pa disfatë në edicionin 2022/23, ndërsa e ka barazuar rekordin e ikonës Johan Cruyff në edicionin 1993/94.
Rekordin si trajner i Barcelonës dhe pa humbje për kohë të gjatë e mban trajneri Luis Enrique. Ai kishte 39 ndeshje rresht pa e pësuar asnjë disfatë.
