Kryetari i Partisë Demokratike të Kosovës (PDK) dhe kandidati për Kryeministër, Bedri Hamza, ka publikuar sot një video të re në kuadër të fushatës zgjedhore, në të cilën ka shpalosur një nga zotimet kryesore ekonomike të programit të tij qeverisës.
Hamza ka theksuar se rritja e vazhdueshme e çmimeve të produkteve bazike po e rëndon ndjeshëm buxhetin familjar dhe se situata kërkon ndërhyrje të menjëhershme nga shteti.
“Të gjithë e dimë sa shumë janë shtrenjtuar produktet bazike. Këto çmime të larta po e rëndojnë çdo familje në vend,” ka deklaruar Hamza.
Ai ka paralajmëruar se, nëse zgjidhet Kryeministër, do të ndërmarrë një hap konkret ekonomik duke ulur TVSH-në për produktet esenciale, ndërsa për një pjesë të tyre ajo do të bëhet zero.
Sipas tij, lista e produkteve përfshin artikuj jetikë për jetën e përditshme, si buka, qumështi dhe produktet e tij, drithërat, vezët, vaji ushqimor, barnat dhe produkte të tjera bazike.
“Kjo do të thotë çmime më të ulëta, më pak barrë për familjet dhe më shumë lehtësim për buxhetin e çdo shtëpie,” ka theksuar kandidati për Kryeministër.
Në përmbyllje të mesazhit, Hamza ka nënvizuar se qasja e tij qeverisëse do të bazohet në drejtësi sociale dhe mbrojtje të standardit jetësor të qytetarëve.
“Sepse askush nuk duhet të luftojë për gjërat elementare të jetës. Unë jam Bedri Hamza, dhe ky është misioni im. Bashkë. Përpara.”
Zotimi për TVSH zero në produktet esenciale është pjesë e platformës ekonomike të PDK-së, e cila synon uljen e çmimeve, rritjen e mirëqenies dhe forcimin e rolit të shtetit në shërbim të qytetarëve.
