Kandidati për kryeministër, nga Partia Demokratike e Kosovës (PDK), Bedri Hamza, ka bërë të ditur se është takuar me Përfaqësuesin Special të Gjermanisë për Ballkanin Perëndimor, Manuel Sarrazin.
Hamza, ka thënë se me Sarrazin kanë pasur një takim të frytshëm me të cilin kanë diskutuar për zhvillimet politike në vend dhe në rajon.
“Si subjekt politik, kemi qenë dhe vazhdojmë të jemi të përkushtuar, që në koordinim të plotë me partnerët tanë ta forcojmë paqen dhe sigurinë në tërë rajonin tonë”, ka shkruar ai në Facebook.
Ndërsa, si kandidat për kryeministër, Hamza ka thënë se prioritete të politikës së jashtme në qeverisjen e tij do të jenë forcimi i subjektivitetit shtetëror, normalizimi i raporteve ndërfqinjësore, përafrimi i vendeve të rajonit dhe integrimi euroatlantik.
“Në rrugën evropiane të Kosovës është jetike përkrahja e Gjermanisë dhe me përkushtim të palëkundur do ta ruajmë partneritetin me të gjithë aleatët tanë”, ka përfunduar shkrimin e tij./teve1.info/
