Kryetari i PDK-së, Bedri Hamza, ka reaguar pas vendimit për lirimin me kusht të Bashkim Smakajt, Fadil Fazliut dhe Haxhi Shalës, duke e cilësuar atë si “një lajm të mirë” dhe “të gëzueshëm” për familjet e tyre dhe për ata që, sipas tij, besojnë në pafajësinë e ish-pjesëtarëve të UÇK-së.
Hamza ka theksuar se ndonëse vendimi sjell gëzim, ai nuk është i plotë, pasi në Hagë, siç është shprehur, vazhdojnë të mbahen “padrejtësisht” edhe ish-luftëtarë të tjerë.
“Megjithatë, ky gëzim nuk është i plotë, as për ta e as për ne. Në Hagë po vazhdojnë të mbahen padrejtësisht edhe çlirimtarë të tjerë. Dhe përderisa edhe një i vetëm prej tyre nuk është kthyer në shtëpi, drejtësia mbetet e mangët”, ka deklaruar Hamza.
Ai ka ritheksuar se lufta e UÇK-së, sipas tij, “ka qenë e drejtë, e pastër dhe çlirimtare”, e udhëhequr nga ideali i lirisë dhe nga mbrojtja e popullit të Kosovës.
Dhomat e Specializuara në Hagë kanë lëshuar komunikatë ku njoftojnë se Bashkim Smakaj, Fadil Fazliu e Haxhi Shala lirohen me kusht.
