Sot në ambientet e kuvendit komunal të Mitrovicës së Jugut u mbajt ceremonia e dorëzim-pranimit të detyrës së kryetarit.
Kryetari i deritanishëm i Mitrovicës së Jugut, njëherësh kryetari i PDK-së Bedri Hamza ka uruar pasuesin e tij në këtë detyrë Faton Pecin nga radhët e Lëvizjes Vetëvendosje, duke shprehur besimin se do të udhëheqë me përgjegjësi gjatë mandatit të ri katërvjeçar.
“Besoj se si ekip, ti duke udhëhequr ekipin do të bëni punë të mira, për qytetin e të gjithë ne që jetojmë në këtë qytet. Sigurisht nuk është lehtë të udhëhiqet një komunë, por bazuar në përvojën menaxheriale dhe politike, besoj se jemi në rrugë. Kudo që të jem do të jap maksimumin për të qenë në dobi të qytetit dhe qytetarëve. Pres një bashkëpunim të mirë mes forcave politike në komunën e Mitrovicës pavarësisht a janë në pozitë apo opozitë. Gara politike ka përfunduar dhe mendoj se tash të gjithë duhet ta koncentrojmë energjinë në drejtim pozitiv dhe në dobi të qytetit. Edhe njëherë urime, suksese e ju priftë e mbara e na prift e mbara”, tha Hamza.
Kryetari i ri i Mitrovicës së Jugut ka falënderuar Bedri Hamzën për punën e kryer gjatë mandatit të tij katërvjeçar në dobi të qytetit dhe qytetarëve.
“Unë thash edhe si kryetar në betim që në emër të qytetarëve t’iu uroj dhe përgëzoj dhe falënderoj për çdo punë të mirë që keni bërë për qytetin. Sikurse the, se gara zgjedhore është garë zgjedhore, sot jemi në një moment të solemnitetit edhe në moment të reflektimit, por ambicia, synimi dhe objektivi ynë është të bëjmë punë të mira për Mitrovicën. E kam thënë çdo herë se na duhet bashkëpunim edhe mes forcave politike dhe mes të gjitha që kanë qenë aktive dhe vazhdojnë të jenë pjesë e garës politike. Kështu që edhe nga ana ime, çdo herë do ta kesh pjesën e vullnetit politik për me bashkëpunim për Mitrovicën, por jo vetëm për Mitrovicën, por për krejt Kosovën”, tha Faton Peci, shkruan KP.
Faton Peci nga radhët e VV-së doli fitues në garën e balotazhit për kryetar të komunës.
