Flamuri i Ushtrisë Çlirimtare të Kosovës e ai i Partisë Demokratike të Kosovës dominonin në Palestrën “Ilaz Kodra” në Skenderaj.
Në këtë qytet, PDK-ja mbajti tubim me simpatizantët e saj, ku prezent ishte kandidati për kryeministër, Bedri Hamza e kryetari i partisë, Memli Krasniqi.
Gjatë fjalimit të tij, Hamza u shpreh se në mandatin e tij si kryeministër, investimet kapitale do të kapin shifrën mbi 6 miliardë eurosh.
“Në ndërtim të infrastrukturës, në ndërtim të sigurisë energjetike për Kosovën tonë do të investojmë mbi 6 miliardë euro në projekte kapitale dhe zhvillimore, në hekurudha në infrastrukturë rrugore, energji dhe furnizim me ujë”, u shprehe Hamza.
Ai theksoi se prioritet do ta ketë edhe kthimin siç tha ai të Kosovës drejt NATO-s dhe Bashkimit Evropian.
Derisa nuk la pa përmendur edhe mbështetjen për kategoritë e dala nga lufta.
“Pensionet do të rriten 50 për qind në fillim të mandatit, e dyta ju prindër të dëshmorëve që jeni prezent këtu, më nuk do të detyroheni të zgjedhni mes pensionit të moshës dhe pensionit të familjes së dëhsmorit sepse do t’i të merrni dy pensionet”, tha Hamza.
Para simpatizantëve, ai premtoi mbështetje edhe për Policinë, Ushtrinë, Arsimtarët, mjekët dhe infermierët ku tha se rritja e pagave do të jetë 50 për qind.
