Kryetari i Partisë Demokratike të Kosovës, Bedri Hamza ka thënë se shpallja e Pavarësisë së Kosovës është kurorëzim i sakrificës së brezave, heronjve, dëshmorëve e martirëve.
Ai në 18-vjetorin e shtetësisë së Kosovës ka thënë se sot përulemi me mirënjohje para familjeve të dëshmorëve, luftëtarëve të lirisë dhe aleatëve tanë që qëndruan pranë nesh në momentet vendimtare.
Hazma ka thënë se në këtë ditë nderojmë edhe ish-krerët e UÇK-së që po gjykohen në Hagë duke kërkuar drejtësi.
“Sot i nderojmë dhe i mbrojmë themeluesit e shtetit tonë, njëherësh bashkëthemeluesit e UÇK-së, që po përballen me padrejtësi në Hagë: Hashim Thaçin, Jakup Krasniqin, Kadri Veselin, Rexhep Selimin dhe bashkëluftëtarët e tyre, duke kërkuar drejtësi të paanshme për luftën tonë çlirimtare. Kosova është amanet. Kosova është përgjegjësi. Kosova është përjetësi. Kosovë, e gëzofsh Ditën e Pavarësisë”, ka shkruar Hamza.
