Ka përfunduar takimi konsultativ i Presidentes Vjosa Osmani me liderët e partive politike për caktimin e datës së zgjedhjeve të reja.
Kryetari i PDK-së, Bedri Hamza, tha se ky moment mund të ishte shmangur dhe se përgjegjësia kryesore për situatën i takon LVV-së si partia më e madhe në vend.
“Diskutuam edhe për mundësinë e datës së organizimit të zgjedhjeve të ardhshme. S’ka pasur asnjë arsye me ardh në këtë moment. Përgjegjësia kryesore i bie partisë më të madhe sepse ka mundur t’i japë vendit president. Zgjedhja e presidentit historikisht ka ndodhur me marrëveshje politike në të gjitha periudhat. Nuk kam vendosur asnjëherë vija të kuqe. Nuk kemi qenë refuzues. Qëllimi ka qenë që vendi të ketë institucione e të mos vazhdohet me këto bllokada,” tha Hamza.
Ai shtoi se PDK do të respektojë çdo vendim të Gjykatës Kushtetuese lidhur me dekretin e Osmanit:
“Ne e shprehëm qëndrimin tonë. E dimë që janë dërguar disa shkresa në Kushtetuese, dhe nuk e dimë se si do t’i trajtojë ato. Por, çdo vendim që meret nga kjo gjykatë, do të respektohet nga PDK. Unë besoj që presidentja e ka analizuar mirë veprimet e veta, ka vepruar në përputhje me detyrimet e veta, megjithatë vendimi i Gjykatës Kushtetuese është i pranueshëm për PDK.”
Sa i përket datës së zgjedhjeve, Hamza tha se kjo do të vendoset nga Presidentja në përputhje me afatet ligjore dhe kushtetuese:
“Cila do të jetë data e zgjedhjeve? Cila datë që të caktohet nga Presidentja e vendit në përputhje me afatet ligjore dhe kushtetuese,” deklaroi ai.
Megjithatë, ai theksoi se zgjedhjet janë të panevojshme, të lodhshme për qytetarët dhe të kushtueshme:
“Mirëpo, asnjë parti politike nuk ka mundur t’i japë vendit president përpos partisë fituese. Ne tash po flasim për datën e zgjedhjeve, dhe jam i bindur se do të kemi rezultat shumë më të mirë se ai i 28 dhjetorit. Koalicioni i ardhshëm qeverisës duhet të mendoj se si t’i bëjë 80 vota,” u shpreh Hamza.
Ai shtoi se është ende herët për të diskutuar kandidatët për kryeministër apo për koalicione parazgjedhore nga ana e PDK-së.
