Kandidati i PDK-së për kryeministër, Bedri Hamza ka premtuar se do ta përfundojnë autostradën për Pejë e cila kalon nga Klina.
Këtë premtim ai e ka dhënë gjatë fjalimit të tij në një tubim të Partisë Demokratike të Kosovës të mbajtur në Klinë.
Hamza po ashtu ka premtuar se do ta ndërtojnë edhe unazën e re që lidh rrugët Klinë-Skenderaj, Klinë-Istog, si dhe do ta bëjnë funksionale linjën hekurudhore Klinë-Prizren.
“Kështu siç ju gjeta sonte Klinë, me plot entuziazëm, me plot energji për fitoren, kështu dua të jeni më 9 shkurt dhe gjithmonë. Autostradën për Pejë, e cila kalon kah Klina, do ta përfundojmë. Unazën e re që lidh rrugët Klinë – Skenderaj dhe Klinë – Istog do ta ndërtojmë. Edhe linjën hekurudhore Klinë – Prizren do ta bëjmë funksionale dhe do ta elektrifikojmë rrjetin hekurudhor në krejt Kosovën. Jemi bashkë për Kosovën që mundet ma mire”, ka thënë Hamza./teve1.info/
