Kryetari i zgjedhur i Partisë Demokratike të Kosovës (PDK), Bedri Hamza, ka deklaruar se është koha për të parë përpara, pas caktimit të datës së zgjedhjeve të reja parlamentare.
Përmes një videomesazhi në Facebook, Hamza ka theksuar se PDK-ja është e gatshme, me ekip, program dhe vizion të qartë për të ardhmen.
Ai ka shtuar se fitorja e partisë do të jetë një fitore për të gjithë Kosovën.
“Data e zgjedhjeve është caktuar dhe tani është koha të shikojmë përpara. PDK është e gatshme, me ekip, me program dhe me vizion. Fitorja e PDK-së do të jetë fitore për Kosovën”, ka shkruar Hamza.
Ndryshe, Presidentja Vjosa Osmani, pas takimit që mbajti të enjten me përfaqësuesit e partive politike ka thënë se ka vendosur që zgjedhjet e jashtëzakonshme do të mbahen më 28 dhjetor.
Osmani ka treguar se tetë parti ishin për datën 28 dhjetor, pesë për 21 dhjetorin dhe tri parti thanë se cilado datë është në rregull për ta./teve1.info/
