Anëtari i Kryesisë së LDK-së, Muhamet Hamiti tha se në një të ardhme do të quhet përparim kur Shtetet e Bashkuara të Amerikës do t’i heqin masat sanksionuese ndaj Kosovës.
Këtë deklaratë ai e dha në emisionin “Ditari” në Tëvë1 derisa po fliste për “mosdëgjueshmërinë” e kryeministrit të Kosovës, Albin Kurti ndaj kërkesave të SHBA-së për shtensionimin e situatës në komunat veriore.
“Ata edhe mund të durojnë, halli është i yni, halli është i Kosovës. Pa këtë lloj përkrahje, Kosova ngec dhe shkon prapa. Janë dëme që pastaj qoftë kjo Qeveri, qoftë një qeveri tjetër kurdo që të zgjidhet do të ketë punë, do të marrë kohë për t’i riparuar fillimisht. Keni me e pa, përparim ka me u quajt në një të ardhme, uroj të jetë e shpejt kur të hiqen këto masa, imagjino. Sepse në 30 e sa vjet për herë të parë Kosova sanksionohet”, ka thënë Hamiti.
“Ka qenë edhe një rast tjetër, një lloj sanksionimi gjatë Qeverisë Kurti 1 kur Kurti refuzonte t’i hiqte ato masat e reciprocitetit dhe qenë ngrirë fondet 50 milionë dollarë të MCC-së dhe qenë shkrirë me ardhjen në krye të Qeverisë të drejtuar nga LDK. Dmth për herë të dytë Kosova sanksionohet për shkak të Kurtit”, ka shtuar Hamiti.