Zëdhënësi ushtarak i Hamasit thotë se lirimi i robërve të mbajtur në Gaza është shtyrë “deri në njoftimin e mëtejshëm” për shkak të shkeljes së kushteve të marrëveshjes së armëpushimit nga Izraeli.
Njoftimi ishte kriza e parë e madhe për armëpushimin e brishtë. Ajo erdhi në një kohë të ndjeshme, me kryeministrin Benjamin Netanyahu nën presion të madh për të sjellë pengjet në shtëpi pas lirimit të së shtunës së kaluar, në të cilën tre izraelitë u kthyen në shtëpi të dobësuar pas 16 muajsh në robëri të Hamasit.
Izraeli dhe Hamasi janë në mes të një armëpushimi gjashtë-javor, gjatë të cilit Hamasi është zotuar të lirojë 33 pengje të kapur në sulmin e tij të 7 tetorit 2023 në këmbim të afro 2,000 të burgosurve palestinezë.
Palët kanë kryer pesë shkëmbime që nga hyrja në fuqi e armëpushimit muajin e kaluar, duke liruar 21 pengje dhe mbi 730 të burgosur palestinezë . Shkëmbimi tjetër, i planifikuar për të shtunën, bëri thirrje për lirimin e tre pengjeve të tjerë izraelitë në këmbim të qindra të burgosurve palestinezë.
Ministri i Mbrojtjes, Israel Katz, tha se plani i Hamasit për të vonuar lirimin e radhës të pengjeve ishte “një shkelje e plotë” e marrëveshjes së armëpushimit dhe se ai udhëzoi ushtrinë izraelite të ishte në nivelin më të lartë të gatishmërisë. Netanyahu nuk komentoi menjëherë.
Zëdhënësi i Hamasit, Abu Obeida, tha se Izraeli ka vazhduar të pengojë dispozitat kryesore të marrëveshjes, veçanërisht në lidhje me ndihmën humanitare, raporton AP.
“Udhëheqja e rezistencës ka monitoruar nga afër shkeljet e armikut dhe dështimin e tij për të zbatuar kushtet e marrëveshjes,” tha Obeida. Ai tha se Izraeli kishte shkelur kushtet e armëpushimit duke mos lejuar palestinezët të kthehen në veri të Gazës, duke kryer sulme në të gjithë Rripin e Gazës dhe duke mos lehtësuar hyrjen e ndihmave humanitare.
Ndërsa, Forumi i Pengjeve dhe Familjeve të Zhdukur, i cili përfaqëson shumë nga familjet e pengjeve, u bëri thirrje vendeve ndërmjetësuese që të rivendosin marrëveshjen ekzistuese.
