Hamasi ka riafirmuar se nuk do të çarmatoset nëse nuk krijohet një shtet i pavarur palestinez, ndërsa grupi publikoi videon e dytë brenda dy ditësh të një pengu izraelit.
Duke iu përgjigjur njërës prej kërkesave kryesore izraelite për t’i dhënë fund luftës në Gaza, Hamasi tha se nuk mund të heqë dorë nga e drejta e tij për “rezistencë të armatosur” nëse nuk krijohet një “shtet palestinez i pavarur dhe plotësisht sovran me Jerusalemin si kryeqytet”, raporton The Guardian.
Negociatat indirekte midis Hamasit dhe Izraelit që synonin të siguronin një armëpushim 60-ditor në luftën e Gazës dhe një marrëveshje për lirimin e pengjeve përfunduan javën e kaluar pa ndonjë marrëveshje.
Bllokada izraelite mbi hyrjen e mallrave dhe ndihmave në Gaza kanë çuar në mungesa të mëdha ushqimi dhe artikujsh të tjerë thelbësorë, duke nxitur kërkesat ndërkombëtare për një armëpushim.
Ekspertët e sigurisë ushqimore të mbështetur nga OKB-ja thanë këtë javë se ” skenari më i keq i urisë ” tani po zhvillohet në Gaza.
Hamasi e ka përfshirë këtë çështje në videot e tyre të pengjeve, duke paralajmëruar se pengjet po vuajnë nga uria bashkë me pengmarrësit e tyre dhe se koha për një armëpushim po mbaron.
