Ish-nënkryetari i Partisë Demokratike të Kosovës, Xhavit Haliti beson se gjuha e përdorur nga Kurti i cili i quajti hajvana, partitë opozitare të legjislaturës së kaluar, nuk është problemi pse PDK, LDK e AAK po refuzojnë bashkëpunimin me Lëvizjen Vetëvendosje dhe Albin Kurtin.
Sipas tij kjo bëhet për interesa të partive që sipas tij, kanë qëllim dërgimin e Kurtit në opozitë.
Megjithatë, Haliti në emisionin “Ditari” në Tëvë1, ka thënë se edhe mes këtyre partive ka probleme.
“Nuk është problemi se si i ka quajtur Albin Kurti, opozitën njëherë, nuk është ky problem. Janë problemet dhe interesat e partive të caktuara, qoftë e PDK-së, LDK-së, AAK-së ,ku interesi kryesor i tyre është që të mos e lënë Albinin me u bë kryeministër por të del në opozitë. Këtë rast të gjithë bashkë nuk po bëhen, sepse edhe partitë mes vete kanë probleme. LDK thotë se pe dua kryeministrin, PDK poashtu”, ka thënë ai.
Ai ka thënë se zgjidhja e situatës është në duart e Lëvizjes Vetëvendosje.
“Ata duhet ta mendojnë mirë se më kë duan të bëjnë koalicion. Duan një koalicion që zgjatë një vit apo katër. Një koalicion që zbaton një program të hartuar bashkë apo një të ndajnë “pjesën e tortës”, kush çka po merr, ose të shkohet në zgjedhje të reja. Nuk është mirë me prolongu në variantin që është duke u bërë”, ka vlerësuar Haliti.
Sa i përket dështimit të zgjedhjes së kryetares së Kuvendit ku LVV ka propozuar, Albulena Haxhiun e cila po kundërshtohet nga partitë opozitare të legjislaturës së kaluar, ai ka vlerësuar se Kurti nuk e ka propozuar atë “për ta djeg”.
“Nuk mendoj që z.Kurti e ka nxjerrë Albulena Haxhiun për ta djegur dhe ndërruar për dikë tjetër dhe për t’i thënë se nuk po të do populli”, ka thënë Haliti në Tëvë1.
