Kryeministri i vendit, Albin Kurti, nuk është koordinuar me Shtetet e Bashkuara të Amerikës për kushtet për themelimin e Asociacionit të Komunave me Shumicë Serbe. Kështu deklaroi deputeti nga Partia Demokratike e Kosovës, Xhavit Haliti.
Haliti po ashtu tha se me themelimin e Asociacionit nuk do të dëmtohej Kosova.
“Nuk e besoj që Kurti është koordinuar me ShBA-të për kushtet që i ka vënë për themelimin e Asociacionit. ShBA-ja nuk punon fshehurazi, sepse përndryshe do e thoshin ata para se t’i thoshte kryeministri Kurti. Me Kushtetutën e Kosovës, Serbia ka të drejtë që t’u vijë në ndihmë serbëve të Kosovë. Infrastruktura nuk e dëmton Kosovën diçka nëse investon në infrastrukturën e pakicës serbe. Ndërsa, te shkollat të gjithë kemi vërejtjet tona, nxënësit serbë kanë problem në qoftë se shkollohen sipas kolikulave të mësimeve që bëjnë nxënësit serbë në Serbi”, deklaroi Haliti në emisionin “Ditari” në Tëvë1.
Madje sipas tij, Kosova nuk është aspak në pozitë për t’i vënë kushte Bashkësisë Ndërkombëtare.
“Përkundrazi, Bashkësia Ndërkombëtare po i vë Kosovës kushte për të arritur deri te marrëveshja”, tha tutje Haliti.
Derisa shtoi se Serbia me argumente të falsifikuara dhe me rrugë korruptive, po pengon shtetet për ta njohur Kosovë, madje edhe për të tërhequr njohjen./teve1.info/.
