Deputeti i Partisë Demokratike të Kosovës, Xhavit Haliti ka deklaruar se presidentja dhe kryeministri janë dakord me KFOR-in për ta bërë një dokument i cili garanton që nuk do të ketë shkelje të marrëveshjes që FSK-ja nuk do të kalojë në veri pa lejen e KFOR-it.
Sipas Halitit, kjo marrëveshje i duhet KFOR-it për t`i garantuar qytetarët e veriut dhe për ta demantuar propagandën e Serbisë, që FSK-ja po i rrezikon qytetarët serb në veri.
“Zakonisht kur ka situata dhe përplasje, KFOR-i po besoj që ka komunikuar me kryeministrin, po besoj me presidenten edhe me ministrin e Mbrojtjes dhe po besoj që ka pasur një dakord për t`a bërë një dokument i cili garanton që nuk do të shkelet marrëveshja që është bërë që FSK-ja nuk do të kalojë në veri pa lejen e KFOR-it, kjo KFOR-it i duhet për t`i garantuar së pari qytetarët e veriut, i duhet për ta demantuar propagandën e Serbisë që FSK-ja po e rrezikon qytetarët serb në veri, ndikon që ndërkombëtarisht duke përfshirë këtu edhe vendet të cilat Serbia i konsideron aleate të binden ose në negociata me ta të prezantohet një dokument zyrtar i Qeverisë së Kosovës dhe unë mendoj që si dokument nuk ka brenda saj ndonjë tradhti”, deklaroi Haliti në emisionin “Info Nata” në Tëvë1.
Madje, ai thotë se çka thotë kryeministri nuk është valide, ngase sipas tij, Kurti nuk mundet me u shmang nga marrëveshjet që janë bërë në raport me KFOR-in.
“Çka thotë Kurti nuk është valide, nuk është diçka që i shërben interesave të Kosovës, ai duhet me ditë që ai nuk mundet me u shmang nga marrëveshjet që janë dhe zotimet që janë bërë në hapësirë dhe në kohë në raport me KFOR-in, KFOR-in e kemi çadër mbrojtëse dhe mbrojtëse të Kosovës dhe në qoftëse ne nuk duhet të merremi vesh edhe për një letër e cila i hyn në punë KFOR-it në bisedimet e përhershme me komandën e Serbisë”, shtoi Haliti./teve1.info/
