Barani ka shkruar se fillimisht më 14 prill 1999 Ivanoviqi së bashku me Igor Simiqin dhe Sergjan Aleksiqin kishin pushkatuar 31 shqiptarë.
“Për këtë rast ka shumë dëshmitarë. Në mesin e tyre është edhe Isa Mustafa, të cilin vetë Oliver Ivanoviqi, bashkë me tre shokë të tij, e ka liruar (shpëtuar nga pushkatimi), i cili menjëherë pas lufte ka ofruar deklaratë me shkrim në KMDLNJ, derisa dëshmitarët tjerë po ngurrojnë dhe nuk kanë dhënë deklarata me shkrim, ngase po frikësohen se mos po u prishet kumbaria me kriminalët serbë”, ka shkruar Barani.
Sipas Baranit edhe më 16 prill te vendi i quajtur Kroi i Broboniqit, Ivanoviqi së bashku me Dejan Saviq, Ratko Antonijeviq, Nenad Paviqeviq e të tjerë, pasi i nxjerrin 9 shqiptarë nga kolona e cila ishte nisur për në Shqipëri, të njëjtit i pushkatojnë.
“Ata janë: Mehdi (Mursel) Tahiri (21), Bashkim (Xhemajl) Abazi (41), banor të lagjes “Bair”, Adem (Muharrem) Demiri (18) nga fshati Sumë i Vushtrrisë, Fatmir (Nezir) Avdyli (18), Fadil (Nezir) Avdyli (25), Bedri (Nezir) Muja (35), Sami (Faik) Sahiti (31), banor të lagjes “Ilirida”, Halil (Qazim) Brahimi (20), banor i lagjes “Ura e Gjakut” dhe Smakë (Hamzë) Maliqi (40) nga fshati Fushë-Ibër i Mitrovicës”, ka shkruar Barani.
Po ashtu Barani ka shkruar se mes 3 e 4 shkurtit 2000 një grup i prirë nga Ivanoviqi kishte vrarë 10 shqiptarë.
“Në mes datave 3 e 4 shkurt 2000 duke filluar rreth orë 21 të 3 shkurt deri rreth orës 4 të dates 4 shkurt viti 2000, kriminelët çetnik serbë, të prirë nga kryekrimineli, Oliver Ivanoviq, i quajtur–Ola, në lagjet “Lumbardhi” dhe “Kodra e Minatorëve” vranë, brenda nëpër shtëpitë dhe banesat e tyre, Muharrem (Ramë) Sokolin (51), Nezir (Hetem) Vocën (61), bashkëshorten e Nezirit, Shqipen (54), Selime (Omer) Berishën (60), Remzije Canhasin (56), Nderim (Nexhmedin) Ajetin (13), Sebaha (Arif) Abrashin (50), Negjmije (Xhevdet) Xhakën (44), Bashkim (Brahim) Rrukecin (38) dhe Niman (Ibish) Sejdiun (52)”, ka shkruar Barani.
Sipas Baranit që nga 3 shkurti 2000 deri në mars 2004 bandat serbe në krye me Ivanoviqin kanë dëbuar 1564 familje shqiptare më 11364 anëtarë.
