Zëdhënësja e Lidhjes Demokratike të Kosovës, Sibel Halimi, ka shkruar se është shqetësuese dhe e patolerueshme sjellja arrogante e kryeministrit, Albin Kurti, ndaj gazetarëve.
Njëherit, lidhur me pezullimin e certifikatës së biznesit të Klan Kosovës nga ana e MINT, Halimi ka thënë se rasti i ndërhyrjes qeveritare, është arbitrar.
“Shqetësuese paraqitja arrogante e kryeministrit Albin Kurti në konferencën për medie. Mllefi ndaj gazetarëve është i patolerueshëm, të cilët rrezikuan jetën e tyre për të raportuar drejt për gjendjen e krijuar në veri. Kjo qeveri çdo ditë është duke e rrezikuar shtetësinë e jetën e qytetarëve. Ndërsa, gabimet në qeverisje mësynë t’i kompensojë me frikësimin e mediave dhe izolimin e vendit. Rasti i ndërhyrjes qeveritare në pavarësinë editoriale të Klan Kosovës, kinse për parregullsi në regjistrimin e biznesit është arbitrar dhe meriton reagim gjithëshoqëror! Kosova meriton qeverisje të mirë, jo regjim! Për pezullimin e certifikatës së biznesit të Klan Kosova, ka reaguar edhe Sekretari Gjeneral i Federatës Europiane të Gazetarëve, Ricardo Gutiérrez, i cili e ka cilësuar si një ditë zie për Kosovën, aktivizimin e shtetit në cenzurë ndaj Klan Kosovës”, ka shkruar Halimi në Facebook.
Madje sipas saj, Kurti nuk ka asnjë strategji konkrete për kthimin e policëve të arrestuar nga Serbia, në shtëpitë e tyre.
“Koordinimi me aleatët e Kosovës është domosdoshmëri emergjente e jo leksione etike ndaj tyre. Megjithëse dëmi i shkaktuar shtetit tonë, në raport me partnerët është jashtëzakonisht i madh”, ka shkruar tutje ajo./teve1.info/.
