Zëdhënësja e LDK-së, Sibel Halimi ka reaguar pas deklarimeve të deputetit të VV-së, Haki Abazi, për zhdukjen e mostrave të Astrit Deharit.
Halimi në Facebook tha se është alarmuese implikimi i vet kryeministrit të vendit në rastin në fjalë.
Teksa ka kërkuar nga Prokuroria veprim të menjëhershëm për zbardhjen e së vërtetës.
“Në këtë kohë, kur Kosova është duke u ballafaquar me kriza të ndryshme e pa asnjë veprim konkret në zgjidhjen e tyre nga ana e qeverisë, është tepër shqetësuese se si deputeti i partisë në pushtet sot na del me informata tronditëse. Posaçërisht është alarmuese edhe implikimi i vet kryeministrit të vendit në rastin e zhdukjes së mostrave të Astrit Deharit. Ndaj, kërkojmë urgjentisht veprimin e menjëhershëm të Prokurorisë në hetimin dhe zbardhjen e së vërtetës, rasti i tillë i ndjeshëm nuk duhet të mbetet i izoluar nga makineria propagandistike ashtu siç edhe dinë ta bëjnë kjo parti”, ka shkruar ajo.
Ndryshe sot deputeti i VV-së, Haki Abazi në konferencë për media ka thënë se e audio-incizimet mund ta konfirmojnë se kush i ka zhdukur mostrat e Astrit Deharit. Madje sipas tij, lidhur me zhdukjen e mostrave për rastin Dehari, Prokuroria duhet ta marrë në pyetje kryeministrin Albin Kurti, Dehona Mihajllin, Albulena Haxhiun, Nazlie Balaj dhe Flutura Gogaj-Bajrami.
Kurse ministrja Haxhiu ka thënë se do të jetë e gatshme që ti shërbej institucioneve të Drejtësisë çdo herë që ata e thërrasin për të dhënë dëshmi./teve1.info./
