Abazi e ka vlerësuar Pakistanin vend mik kurse hapjen e ambasadës atje, të nevojshme.
“Për shumë muaj kam kërkuar nga MPJ që të fillojë procedurat për hapjen e ambasadës në Pakistan. Pakistani është vend mik, e ka njohur pavarësinë dhe ish-ambasadori i Pakistanit në Beograd ishte urdhëruar ta lëshonte Beogradin për shkak të protestës së tij kundër dhunës së Millosheviqit. Pakistani është një ndër shtetet më të rëndësishme dhe potencial të madh zhvillimor. Është mendësi strategjike e veprim i duhur diplomatik që Kosova të ketë përfaqësim diplomatik në Islamabad. Ripërsëris kërkesën time ndaj ministrisë”, është shprehur ai.
Abazi ka shtuar se me ambasadë në Pakistan Kosova do të kishte mundësi për njohje të reja nga vendet islamike.
“Arsyeja e përfaqësimit tonë atje është që vendet islamike që nuk e kanë njohur Kosovën, kanë përfaqësim të fuqishëm në këtë vend dhe mundësia që ta shtyjmë agjendën e njohjeve bëhet reale nëse kemi përfaqësim në Islamabad”, theksoi ai.
